Ministè Agrikilti Resous Natirèl ak Devlopman Riral (MARNDR) di li sezi aprann nan laprès minis Agrikilti a ta pataje ak Repiblik Dominikèn yon dokiman sekrè ki ta bay Prezidan Luis Abinader an rezon sou pozisyon li pran nan dosye konstriksyon kanal sou Rivyè Masak la. Nan Yon nòt ki parèt nan dat jedi 21 septanm nan, ministè a ap demanti rimè sa ki, daprè li, pa chita sou pyès fondman. Li deside pou l akonpaye travay konstriksyon Kanal la.
MARNDR popilasyon an konnen li toujou defann pozisyon ki ale nan enterè peyizan ak agrikiltè nan Plèn Maribawou. Se pou rezon sa, li di li toujou defann dwa pou peyi Dayiti benefisye egal a egal resous peyi a pataje ak vwazen dominiken nan tout reyinyon yo.
Nan sousi sa, ministè Agrikilti di li gentan pran dispozisyon a travè Direksyon Depatmantal Nòdès pou li akonpaye chantye konstriksyon Kanal la, menm jan Gouvènman an te mande l nan Deklarasyon jou ki te 13 septanm nan.
Ministè a deside pou akonpaye travay konstriksyon Kanal la yon fason pou li reponn ak nòm teknik yo epi tou pou li pa gen okenn enpak sou lavi moun ak plantasyon nan Ba Maribawou.
Ministè a raple li toujou rete disponib pou li chita ak tout sektè ki konsène nan konstriksyon Kanal la pou yon pi bon planifikasyon chantye yo.
« San nou pa bliye mobilizasyon se ekspresyon solidarité ak patriyotis yon popilasyon ki montre tout mond lan Ayiti se yon Nasyon granmoun, n ap di : Wi fòk kanal la fèt ; wi fòk gen jefò ki fèt pou dlo rive kòm sa dwa nan kanal yo ; wi se nan solidarite ak tèt ansanm pou tè maribawou rive wouze », se pozisyon ministè Agrikilti sou konstrikksyon kanal sou Rivyè Masak la.
