Akademi Kreyòl Ayisyen (AKA) di li aprann ak anpil lapèn nouvèl lanmò jounalis Liliane Pierre-Paul nan dat lendi 31 jiyè 2023 a, ak 70 lane sou tèt li. AKA kontinye pou l di jounalis la se te yon gwo defansè lang kreyòl ayisyen epi yon poto mitan nan kesyon radyodifizyon an Ayiti.
Daprè pi gwo otorite nan sa ki gen pou wè ak lang kreyòl ayisyen an, Liliane Pierre-Paul, pandan tout tan li t ap egzèse pwofesyon li kòm jounalis, li te toujou mete lang kreyòl la, ki se lang majorite a devan. Li te angaje li jan li te kapab pou fè respekte dwa lengwistik pèp ayisyen an epi goumen pou libète lapawòl rete vivan.
« Se yon pèsonaj ki jwe yon wòl fondamantal nan batay pou tabli demokrasi nan peyi a. Se te yon fanm vanyan ki te pran reskonsabilite sitwayen li nan goumen pou chak grenn Ayisyen kapab jwi libète lapawòl li kòm sa dwa », se pawòl AKA nan yon nòt ki parèt jedi 3 dawou 2023.
AKA raple, nan dat 28 oktòb 2020, nan okazyon Jounen entènasyonal lang ak kilti kreyòl, nan Palè minisipal, Akademi Kreyòl Ayisyen an te remèt bay jounalis la yon Plak onè ak merit, yon fason pou li te di Liliane Pierre-Paul mèsi pou bèl kontribisyon li pote nan ede nou konsève eritaj sa a ki se lang kreyòl ayisyen an.
Pandan l ap selebre lavi Liliane Pierre-Paul, Akademi Kreyòl Ayisyen di li wete chapo l byen ba pou salye memwa fanm vanyan sa a epi swete fanmi, zanmi, kolaboratè li nan Radio Kiskeya, pwòch ak oditè li yo anpil kouraj pou yo travèse moman difisil sila.
