Konbit Oganizasyon Politik Sendikal ak Popilè yo di se ak anpil enterè y ap swiv dimansyon kriz k ap brase bil peyi a jounen jodi a. Fas ak konpòtman penyen lage Otorite ki la yo, li lanse yon apèl pou yon soulèvman jeneral pou retire peyi a nan kriz sa k ap toupizi l la.
Nan Yon nòt ki parèt yè jedi 26 janvier 2023 a, Konbit di li wè depi lè Premye minis Ariel Henry ak alye li yo fin mande entèvansyon militè nan peyi a, se chak jou y ap poze zak pou montre nesesite entèvansyon militè a.
Pou kore sa li di a, òganizasyon sa fè sonje gen 15 polisye ki mouri asasinen, nan 15 jou sèlman. Li kontinye pou li di plis pase 18 polisye deja mouri asasinen pandan mwa janvye a ki poko menm fini. Yon sitiyasyon ki lakòz yon gwo leve kanpe nan lapolis la. Mete sou sa, zak kidnapin yo kontinye ap taye banda. Nan dènye jou sa yo, li pran yon lòt vitès.
Pi lwen, li di konsa ‹‹ se nan vag sa a bandi legal kidnape pwofesè Pierre Buteau anndan lakay li. Pandan tan sa a, grangou, lavichè, kidnapin, vyòl sou fanm ak tifi epi pwoblèm gaz la kontinye ap mete gaz sou lestomak popilasyon an. ››
Devan sitiyasyon malouk sa a, Konbit di li sonnen lanbi mobilizasyon an nan tout peyi a pou yon soulèvman jeneral pou nou pouse do Konsèy Siperyè Polis Nasyonal la, patikilyèman Ariel Henry ak akolit li yo.
Pou fini, li voye yon gwo kout chapo bay tout moun nan popilasyon an nan diferan vil pwovens yo ki deja koumanse leve kanpe. ‹‹ An n kontinye leve kanpe kont ensekirite, kidnapin, grangou ak tout atoufè lokal ak entènasyonal ki pran peyi a nan otaj. Bare anwo, bare anba jouk sa kaba. Pèp k ap batay toutbon, pa janm pèdi batay ››, se sa nou li nan nòt sa ki pote sinyati pwofesè Josué Mérilien, Guy Numa, Patrick Joseph ak Jean Paul Bastien.
