Nan dat 20 novanm nan, Peyi Kanada kap travay men nan men ak Etazini pou sanksyone pèsonalite politik an Ayiti ki nan dwòg, nan blanchiman lajan ak finanse gang nan peyi a, rive sou ansyen PM Céant ak Lamothe epi sou Martelly ansyen prezidan peyi a (2012-2017). 3 zotobre sa yo, se plis pou zafè kòkòday yo ak gang kap fè kidnapin, simaye dèy ak destabilize peyi a. Yo tout di kanada pa gen prèv.
Lamothe ki te Premye Minis sou Martelly ant 16 Me 2012 pou rive 14 desanm 2014, pale plis e menm di se yon ti gwoup moun ki pa vle tande pale de « Jistis pou Jovenel » ki atake li, epi fè Kanada fè yon gwo erè. Pou li non sèlman kanada pa fè envestigasyon sou anyen, li di li deja angaje avoka li ki pral klarifye kesyon sa ki pap rete konsa, pandan li site tout chef gang li te mete nan prizon, tankou Clifford Brandt, Arnel Joseph ak « Sonson Lafamilia », lè li te Premye Minis.
Dènye mesye sa a te fè pati « baz galil », yon gwoup yo toujou di moun ki ladanl yo se bon zanmi ansyen Prezidan Martelly. Dayè yo te lage li. Jij la te di li nan yon pawòl ki sanble konsa « ale, pa peche ankò ». Lamothe fè remake se lè li pa premye Minis Sonson Lafamilia te lage. Lè yo chache konnen si li pa pale ak Martelly sou zafè sanksyon sa a, li fè konnen li pa pale ak Martelly depi preske 18 mwa. Depi asasina Jovenel Moise la. Li di li pat konprann silans Martelly, alòske se li menm ki te chwazi Jovenel pou prezidan. Li santi sa pat enterese Martelly twòp. Yon pawòl ki sonnen tou pre sa ansyen senatè Gabriel Fortuné te di sou lanmò Jovenel la : parenn prezidan an livrel (le Président a été livré par son parrain, en français).
Finalman 18 mwa depi mesye sa yo pa « Kòkòt ak Figaro ». Men gen enfòmasyon ki di se depi lè Martelly te lage Lamothe pou li pèdi pòs Premye Minis la, mesye yo te deja « lèt ak sitron ». Ofisyèlman kounye a, se pawòl ki soti nan bouch Lamothe, li pa nan pale epi li pa gen okenn kontak ak Martelly depi asasina Jovenel la. An n raple, yon kòmando antre lakay Prezidan Jovenel, krabinen li, san sekirite li pa tire menm yon peta.
Li tou : Les États-Unis soutiennent les sanctions canadiennes prises contre des personnalités haïtiennes
