Naples Fl, 20 Novanm 2022. – Etazini pa klase nimewo 1 nan baskètbòl ankò. Lespay rache mayèt la nan men li daprè FIBA, federasyon entènasyonal ki kwafe zafè baskètbòl la.
Se konsa, menm nan konpetisyon nasyonal yo, Nan NBA a, se jwè etranje kap bay meyè pèfòmans yo depi 2 3 ane. Giannis Antetokunmpo, yon jwè ki fèt e reprezante Grès e ki gen orijin Nijeryen ap konbat ak Joel Embiid, yon Kamewounè ki gen nasyonalite Fransè ak Ameriken pou plas meyè jwè pou ane a. Joel poko chwazi pou ki ekip l ap jwe, men, li eligib pou l jwe pou Kameroun, Frans, oubyen pou Etazini. Li te fèt Kamewoun, men li gen nasyonalite peyi Lafrans ak Etazini, 2 peyi ki montre enterè yo pou Joel ta reprezante yo nan zafè baskètbòl.
Luka Dončić, yon jwè Sloveni, ak Nikola Jokić, yon jwè Sèbi, se 2 lòt jwè entènasyonal ki bay anpil pwoblèm nan NBA a, pi gwo chanpyona baskètbòl nan Etazini e nan mond lan.
Apre frè Gasol yo, Pau avèk Mark, kite zafè konpetisyon entènasyonal, ekip Lespay pa gen jwè nan tèt NBA a. Men, yo gen yon ekip solid ki jwe byen ansanm e k ap bat lòt ekip, sitou nan chanpyona ki fèt an Ewop.
Done yo ka chanje apre pwochen koup FIBA k ap fèt an 2023.
(Jhony Desinor ✍️🏽)
TNGN
Naples Fl
20 Novanm 2022
