Peyi a bloke depi 2 mwa pou kesyon gaz. Gouvènman monte gaz la dizèt otè, bandi monte li swasanndisèt otè. Yon lane avan kòb ou tap achte douz galon dizèl, wap achte yon sèl avèl jodia. Pou gazolin nan menm, w ap achte youn pou kòb kenz. Sa fè tout aktivite bwè gaz. Lekòl an premye.
Lekòl kite sipoze ouvè 3 septanm, gouvènman deside remete li pou oktòb, paske li di paran yo manke mwayen. Avan menm lekòl la pran nan mwa oktòb la, gouvènman an plis pase double kòb gaz la. Sa ki fè tout pwodwi vin pi chè. Pri tout pwodwi manje oubyen zafè lekòl double. Genyen ki vin 3 oubyen 4 fwa pi chè. Pyès moun pa konprann lojik la. Men gen yon moun ki di : gouvènman, boujwazi, gang, menm konba. Gouvènman monte gaz pou boujwa, boujwa mande gang bloke gaz (pou li ka negosye lòt bagay ak gouvènman), gang bloke gaz la epi nan akò ak boujwa lage tikras nan lari a. Sa ki rann li ki vin pi chè (Sa ou pa jwenn anpil epi moun ap mande l, li vin chè. Se yon prensip kadinal), menm lè se ta kay vwazen an nap achte gaz. Dayè sa ki di li menm tou yon lòt bò, li pap bay gaz pou destabilize. Men antouka sòt ki bay enbesil ki pa pran.
Lè n ap gade pi lwen, tout aktivite ekonomik peyi a bwè gaz. Peyi kanpe. N ap tann. Nou pa konn sa n ap tann. Pandan tan sa a, fèt Gede rive. Sèl Gede ki pa bwè gaz. Se fèt lanmò. Fèt moun ki mouri deja. Te gen anpil piman. Gede bwè piman tout kote. Te gen kleren tou, kanmenm. Moun mouri yo pa ka repwoche nou. Gen moun ki mache plizyè kilomèt pou ale nan simityè pou salye mò pa yo, oubyen pou selebre tout mò. Te gen anpil gouyad tou. Gede pa fèt san sa. Se nan gouyad nou fèt. Yon kout gouyad pou sonje nou, kontinye voye nou ale anpè. Sèl lanmò k ap rete.
Men se vre. Se sèl kidnapin, mizè ak lanmò ki pa bwè gaz isit, nan moman sa a. Chif ki disponib yo di, pandan 2 dènye mwa yo, anpil anpil moun mouri asasinen tout kote nan peyi a, lè se pa kidnapin ki tou dekonstonbre yo. Lapolis ap touye. Bandi/gang ap touye. Nou pa konn pou kiyès, pou ki rezon, oubyen si se foli pèsonèl. Men se nòmal, sonje jistis bwè gaz lontan isit. Ou mouri, ou mouri nèt. Pyès moun pa ka panse jwenn lajistis. Nan tout lanmò kap simaye dènye jou sa yo, youn pase pran Eric Jean-Baptiste, ansyen kandida prezidan, prezidan pati RDNP pati Leslie Manigat a, epi li nan mitan moun kap fè lajan yo. Yon lòt bò, lapolis fizye andirèk jounalis Romelson Vilcin, epi moun yo pa rive idantifye manke wete souf Roberson Alphonse semèn pase a. Nou redi sa, pou nou pa bliye. Plen imaj lanmò sou rezo sosyal yo. Se lanmò kap fè koze isit.
Finalman, li fasil pou moun bwè gaz isit. Tout bagay bwè gaz isit, nan moman an. Gede sèl ki pa bwè gaz. Gade byen pou wè, moun ki te ka manje 2 fwa nan yon jounen, kounye a tonbe nan atagaz. Ebyen, dim zanmim yo, sak rive ansyen atagaz yo menm?
