Nan peyi d Ayiti, medam yo pat janm tann kreyasyon yon jounen entènasyonal dwa fanm pou yo te angaje yo nan batay sa a. Nan tradisyon peyi nou, medam yo te toujou jwe yon wòl potomitan, kote nan fwaye a, anpil nan yo te toujou jwe wòl manman ak papa an menm tan.
Biwo Minis Delege bò kote Premye Minis la kap Defann Dwa Moun epi kap Lite Kont Povrete ekstrèm
Nòt pou Laprès
Pòtoprens, 8 mas 2021. – Se sou tèm « Lidèchip fanm : pou yon demen egal ego toupatou sou latè nan kontèks Kovid-19 la » nap selebre jodi 8 mas 2021 an jounen entènasyonal dwa fanm. Jounen sa a, kap selebre nan prèske tout peyi sou latè, raple nou wòl fanm yo jwe nan batay pou yon sosyete san fòs kote ki chita sou lajistis, byenèt ekonomik ak sosyal pou tout moun alawonnbadè.
Pa bò lakay nou nan peyi d Ayiti, jounen sa a se okazyon pou rann omaj ak tout fanm vanyan, tout òganizasyon dwa fanm san paspouki ki pa sispann bay bourad pou bati yon lòt sosyete kote tout pitit peyi a dwe viv byen. Se okazyon tou pou n kontinye batay pou n prepare teren an pou lòt jenerasyon fanm kap vini yo.
Nan okazyon gran jou sa, Biwo Minis Delege bò kote Premye Minis la kap Defann Dwa Moun epi kap Lite Kont Povrete ekstrèm vle mete aksan sou enpòtans medam yo nan batay pou chanje lavi. Nan peyi d Ayiti, medam yo pat janm tann kreyasyon yon jounen entènasyonal dwa fanm pou yo te angaje yo nan batay sa a. Nan tradisyon peyi nou, medam yo te toujou jwe yon wòl potomitan, kote nan fwaye a, anpil nan yo te toujou jwe wòl manman ak papa an menm tan.
Nan dènye lane sa yo, nou konstate medam yo vin pi prezan nan pran inisyativ pou non sèlman kondisyon lavi fanm men tou pou angaje yo nan tout domèn tankou politik, ekonomik ak sosyal.
Pandan Biwo Minis Delege ap rekonèt wòl fanm yo nan gwo konba pou chanje eskanp figi sosyete ayisyèn lan, lap pwofite renouvle angajman li an favè respè dwa fanm ak tifi sou tout teritwa nasyonal la.
Jounen 8 mas 2021 an ofri nou okazyon pou n kontinye reflechi epi pote api nou pou yon demen miyò pou tout fanm ayisyèn kèlkeswa kote lap viv sou teritwa peyi d Ayiti.
Dwa Moun se zafè tout moun se zafè chak moun .
Bon jounen entènasyonal dwa fanm ak tout fanm ayisyèn pa bò isit
