Tèt mòn yo vyolèt toujou, syèl la kale tou woz, lè an frèt, li dous. Silans total, anyen pa bouje pandan jounen an ap boujonnen. Tanzantan yon kòk kreve vwèl silans lan ak yon rafal kokoriko. Poutan kou l fin kòdlase, silans lan tounen vyèj.
San yon tras lokans, li reprann plas li, blayi sou pyebwa yo ke rès lannwit lan abiye ak yon koulè vètsonm. Li kouri sou lavale chan kann nan ki kouche anfas lan, epi dousman tou dousman li karese dlo tikannal lan jouktan sila-a dakò gagari kòl ansilans.
Tanzantan yon madan sara vin f on ti palab san bri ak yon zandolit k ap babye, plede anfle babin li sou pye lamveritab la. Mwen m deja sou de pye militè m sou galri an m ap desann yon wayal ki sot okap. Fini m fini wayal la, san pèdi tan, m fann chan kann nan ak 2 gamèl pou m al konte manmèl. M tate, yo rèd kou ke makak, m panche pou m louvri vàn lèt lan nan ladigòt mwen anvan m plen kannistè yo. Tanzantan m mouye l pou m tire san kanpe san pran souf jan m renmen sa.
Kaptèn solèy vin bare m nan manmèl bèf la, li griyen je l sou mwen. M santi l k ap pike m. Li lè pou m antre lakay. Jodi 18 me an chaje kou legba ak aktivite e se sa ki pran m mennenm sou bitasyon grandèt yo pou m pase fèt la. Lè m rive sou granchimen m fè kolizyon ak ti kenkenn, yon ti zway m te konn bat do, mete l kanpe fè l fè bèl. Ti kenken enstale anndan yon kostim ble maren san pli, fre kou kola kenz.
- Mezanmi jou kouri ti Kenkenn. Mezanmi nèg pa w fin jènjan sou mwen la! Kot w ap bay la menm? Ò pa w mal pou w reponn mwen. Pa bezwen timid. Se mwen wi.
Ti Kenken pa bwa l pa wòch. M ka pale pou de. Sa pa pwoblèm.
- E pa ti fre non. Se gwo koze Ken. Lòt paj gran lam de jènjan. W pa di m non. Kot w ap bay la? W pral nan parad 18 me?
- Rete ti Kenken!
- Matant pou tout chay respè sa m gen pou ou an pa pale m de kesyon drapo. Se yon okazyon m ap veye la pou m jete m. Li mèt alanaj wi m pral fè wout mwen. Zafè si m mouri. Zafè reken pran m.
Pou kalte kasav ak manba sa m sot desann nan, pou jan mwen ak Nadine, gran sè Kenkenn, pataje lanmou pou drapo, pou peyi pou listwa nou, pou bellegarde podyab ki gen konbyen lane depi l ap fè moral nou, m kare kòm pou m simen leson drapo sou Kenkenn.
M pale ti Kenkenn de sans drapo an, senbòl sa li reprezante pou nou tout, lè l ap flote kijan nou dwe tresayi paske li koud ak nanm nou.
M ale pi lwen. M rakonte l sa nou te viv mwen ak Nadine yon 18 me konsa lè n ap mache nan lari Leyogàn ap chante ak lespri zansèt nou, nan mitan yon mare moun.
- « Nous te voulons chère patrie nous te voulons terre bénie ». Bagay pou w ta wè ti Kenkenn. kò nou trese ak chèdepoul, nanm nou swe, je nou koule dlo. Solèy ap boukannen nou men se yon omaj ki pa ka nan kalkile sakrifis. Se sa Nadine te di.
- Yon gwo lapli vin fè solèy la kraze rak. Anpil nan nou te kase tèt tounen, e mwen m redi men Nadine pou m fòse l bat ba pou nou rantre paske lakay yon ti te cho t ap tann nou kanmèm, Yon plat matenten ak aransèl te kouvri sou tab la pou nou kanmèm ak moso zaboka. M rale men l pou n antre. Dayè pifò moun te deja rantre lakay yo paske lapli isit mennen labou e menm machin konn antrave. Men kòm repons Nadine leve drapo an pi wo de men li. Jès li pale.
- Lapli an bouche je nou, l ap tonbe ak raj, fò n avanse, fò n fè gwo efò sinon fredi ka antòtye nou. Kò m donnen chèdepoul, se te fyète ki te anvayi m. Epi m tanmen chante ak tout kè m ak tout nanm mwen ak tout souf mwen nan mitan yon lapli k ap benyen m jis nan zo. Nou te sèlman dis ki rive devan meri an. Nou mouye kou kanna n ap chante, n ap make pa. E majistra a pou l te rekonpanse nou te remèt nou chak yon bèl meday.
Dan m deyò m ap reviv moman sa poutan ti Kenkenn tande san l pa bat je l.
- Kilè w vin isit?
- Yeswa m antre. M poko wè pèsòn.
- Enben fò m…
Li pa gentan pale. Yon rèl fanm, yon rèl kraze manm, yon rèl fyèl pete leve. San m pa konn poukisa m pèdi fòs, bonnanj mwen vole, kè m pran bat fò. Wout ki sòti anba rak pyebwa yo ap vomi moun. Anpil anpil moun. Men pigwo rèl la se Sòmèmèn ki t ap pote l.
- Pitit mwen, pitit fi m, pitit kouraj mwen, pitit mizè m, bout souf mwen. Tonnèboule m se pou yo te antere m avè w.
Je m bite nan je Ti Kenkenn. San yon mo m konprann. Sòmèmèn, manman ti Kenkenn, ranni.
- Nadiiiiiiiiiiiiiiiiiiiiiiine gad sa bandi ak zam fè w, gad sa otorite k ap bay bandi tete fè w. Nadine ( vwa a febli, li fennen, vanse mouri) Nadine gad sa peyi w fè w.
Pandan flo moun yo ap pase devan m, je wouj, je anfle, nan kominyon ak tout douz milyon an sa k isit, sa k ap chache lavi lòtbò dlo, nan kominyon ak zantray mwen, trip mwen ki di m yo pa kapab ankò m tonbe a jenou.
#peyiasenou
Saïka Céus
