Vil leyogàn jodi an mare tèt li ak yon syèl ble san tach. Konpè solèy ap make pa dousman jiskaske li rive pou kounya sou dizè. Nouvèl la tonbe,tout zwazo met bèk ansanm pou gaye li nan « SABOUS. Yon mèl vole sot nan yon lavale chan mayi wouze anfas la vin patisipe nan koral la. Poustabak, Madan sara ak wanganègès ap fè kè.
Fèy kokoye ak lamveritab ap souke kò yo. Tankou prèske tout kote SABOUS, bitasyon an gen yon ekip pye kokoye peyi ki fè wonn li, epi anndan an, gen Pye lam ki chita kot tout kalte pye mango. Mango gwopo, mango fil, Mango Batis, mango pensik, mango fransik, mango madan blan, Pye kenèp, korosòl ak latriye lòt pyebwa. Jounen an gen yon sant mango mi.
M lonje toulong nan yon amak nan mitan yon Pye mango gwopo ak yon chèn ki pouse tou dwat. M ap balanse de bò.
Ton Zilrak, ansyen lakou a, tonton tout moun san l pa ni frè manman yo ni papa yo, ki sot nan tete bèf yo nan jaden an, rive ak yon galon plen lèt nan lakou a. Li jwenn Coupe Cloue k ap pwomennen sou mi galri kay la, nan yon radyo twaka mò ki fikse ak yon sèso.
Vwa Koupe vin jwenn li jis devan an. Ton Zilrak kouvri vwa papa konpa manba a ak pa l. Vwa Zilrak pa t pran okenn blokis ditou paske l pa rete yon kòmandan menm anndan bouch li. De twa timoun ki t ap trase marèl, fouye tou Kay, ak lòt jwèt nan lakou a kanpe pou gade li. Kit, mèl, wanganègès, kaw, kolibri, poustabak….tout vole gagè kite lakou an san gade dèyè pou chache wout silans.
M santi jan yo bat zèl yo, gwo mizisyen, chantè lanati yo gen anpil repwòch pou fè granmoun lan. Ton Zilrak pa wè li pa tande, de je li fèmen, de bra li louvri, l ap chante, galon lèt la atè lontan, grandèt la ap dodomeya nan yon konpa dousmakòs.
– Tout moun leve, tout moun leve, tout moun ap deplase, ap deplase.
Tout moun leve, tout moun leve, tout moun ap deplase ap deplase
mwen menm pa fouti leve
mwen pòtre yon nonm yo mare.
M ape mande m ape mande kisa ki rive m la, sa k rive m la.
Se atò m vin konstate se yon mizik ki mare Pye m mizik la dous pase siwo e mwen menm, mwen se foumi. Foumi deja sèmante se nan siwo pou l mouri.
Pan pan pandan pan pan pan pan.
Pye varis Zilrak yo ap trase pa atè a tankou se trapèz l ap desine. Pa a dwat, pa a goch, ap-ap li vole. Se yon jewometri san parèy.
Chak fwa li leve pye li, swasandizan yo gaye epi yon ponyen laj sot tonbe glise desann. Sèl cheve koulè lanmidon yo ki rete. Lè w gad yon espektak konsa w ap padone l lapoula vwa tòl la. Li fè yon vole ankò, tankou se antrenman ninja. M pa gen tan mande l ki son ki fè l fè lekatay sa. M pa gen tan. M ateri sou fas sòti sou amak la.
Klèliz yon ti zway ki ka nan douzan yo vòltije m atè nan kouri. Li gen yon rèl ki ka reveye mò nan simityè. Po albinòs li an fè doukdouk epi gonfle wouj. Je vèt li yo plen dlo y ap danse nan tout sans. Li kouri pase dèyè ton Zilrak ki oblije kite Coupe ak ansanm selèk la fini serenad la poukont li. Yon madanm sousi kadnase ap mache dèyè tifi albinòs la pyepoupye ak yon fil kab nan men li.
Ton Zilrak kontrarye. Mwen menm tou. Madan m nan proche kote m.
– Wouy bèlchè pitit fi mwen eskize mwen. Ou pa frape?
Li longe bouch katchapika li an nan direksyon ti albinòs la. Eske w we sa w fè madmwazèl la Klèliz?
Ton Zilrak antre nan koze a.
– Sa l fè w la menm pou w ak gwosè kab sa tankou se vòlò w ap maspinen an.
– M fè kòlè ak li twop. Pandan semen nan la se nenpòt 3 fwa wi m nan de ran ak Klèliz. O non! Non! non!. Sa twòp pou mwen. M ap voye l ale.
Ton Zilrak fè yon soupi. Li kòmanse depasyante. Mwen menm tou.
– Sa l fè w kòmè?
M kwaze bra m. Je m ap fouye je madan m. M ap tann.
– Te kwè yon ti Poul li tchwe maten an, li ap sizonnen li, li leve, li kite l epi parèy li a, chat la ki lakay la manje l. Se ti releng yo ki rete wi. Kounya kisa m pral bay Kay la manje?
Klèliz ap kriye. Li santi gen rafal k ap vin sou li toujou. Li kole kòl nan do Ton Zilrak prèske lage l atè.
– Se rele w te rele m. W di m vini…. Vini…vit wi matant. (Okèt anpeche l pale. Li ògeye) Matant ou banm kout konbèlann nan nan tèt matant. Li pran m nan tèt matant.
Klèliz ap vomi tout lapèn li, Fi a mare min li, li trese bouch li.
– Ey fèmen bouch ou la. Bon dayè fè m pa tande w. Fè m pa tande w. Tonniskrizibòt se byen w two byen. M ap voye w tounen kote m te pran w lan. Lè se pa rad ou gate ak klowòks, oubyen se kòb mwen w al fè kado nan mache a. Ekspre ou fè gwosè timoun tankou w, w pa ka fè PRI ak machann yo? Si se te Pou lakay ou w patap fè pri?. Ton Zilrak sanble se konplo li fè ak machann yo Pou fè yo kado kòb mwen. Epi mete l lekòl li p ap aprann anyen.
Ton Zilrak kwaze de bra li dèyè do l Pou reflechi.
– kidonk Madan Elwa, w ap voye l ale lakay li?
– m pa gen chwa.
– si sete pitit ou kisa w t ap fè?
Si madanm nan fè de sezisman konsa li p ap bon pou li. De je l ap fè balansin. Ton Zilrak souke tèt li.
– W konn sak pase Madan Elwa m pral di w yon bagay.
– Wi ton Zilrak.
– W wè mwen? M se malerèz e m konn sa. M konn mezi Pye m e m koke Djakout mwen kote men m ka rive. M fè de pitit men anvan m fè yo m fè kalkil epi mwen wè bèf yo ak jaden an ap ride m ba yo ledikasyon men se de sèl m fè. Se sa kalkil mwen banm.
Madan m nan santi yo pran kouran an nan mitan koze Ton Zilrak ap lage nan men l yo.
– Ton Zilrak m pa fin konprann non.
– Tou sa madan Elwa se pou m di w ke m patap janm pran yon timoun douzan m lage l nan men moun pou fè li monte maswife ak kikit. Se pa avè w mwen ye non. Men Kijan w ta ka konprann yon timoun douzan reskonsab yon kay, lave, pase, bale epi ap pran baton pou li ta aprann lekòl byen? Epi ki lekòl wi? Kijan menm w ta ka panse l ap gen tout nanm li sou li pandanstan depi l manke kilbite se sou wozèt li tonbe?
Eksplike m èske Pipo ti bray disèt lane ou an pata ka bay yon kout men nan Kay la? Avanyè w wonfle timoun nan. Wi m te tande. M tande li rive nan makèt la anba a al achte yon vyann moulen, li tounen de men vid paske li di w li frape nan pòt makèt la madanm nan pa leve vin louvri Pou li, li tounen. Ou mache rakonte tout moun sa epi w maspinen l pou w mete nanm sou li. Ou te dwe mete nanm sou ou anvan machè.
Pipo la lajounen kou lannwit li p ap ede w fè anyen. Rayi m, renmen m, bouch mwen se Pou m pale do m se Pou moun pale m mal. Mwen m ap pale. Si se te pitit ou, w pa gen okenn kote w ta pral remet li, paske kouto w pou ou li blese w, w siye l epi foure l nan pòch ou. Lè nou vire andeyò n al chache timoun moun nan men mèt yo se pa tchyoul nou al chache. Ni akòdeyon ki Pou vin ba nou enpòtans.
M p ap di w pa bat li. Ou granmoun ou gen konsyans.
Li vire sou ti albinòs la.
Klèliz mache al jwenn Madan Elwa Pete fyèl ou, maspinen w, toupizi w. Al jwenn li pou li santi l gen fòs, al jwenn li pou pase tout ray li sou ou, pou li soufle tout restan moun li ye a sou ou. Mache ale non pou li trase po w ak konbèlann nan. Mwen lè m al nan mòn, m a va di Manman w SA JE M BAN M, si mouche leta pa gentan pase.
Klèliz Pete rèl….
#SA JE M BANM
Saîka Céus
@tous droits réservés
