#Sa jem banm
Yon lapriyè bondye pa dwe tande…
Lannwit lan demwazèl. Syèl la ba. Ladan l plizyè zetwal gentan ap pann sou tèt kay yo ki kale bobis. Pa gen yon pyebwa nan zòn nan pou abiye tèt kay yo.
Nan yon kadè tout lakou plen ragagann ak lank fènwa ki chavire nan lari an. Li louvri gòj li pou vale bri pye ak fò m kò moun. Ou pa fouti wè ni tande anyen. De tanzantan yon ti van ap fè lago ak fèy bwa yo epi vante sekrè ki te kachte nan lajounen an deyò.
M kage tèt mwen, yon pafen anvayi m. Pafen sa se li madansara mete, se ak li ti machann yo sèvi, se li potè, bèfchenn mete. Li konpoze ak redidi, kouraj, laswè. Li fèt ak lespwa chak grenn jèn ki kwè jodi an yo ka rele yo pou yon travay paske cv yo nan tout bwat.
M fin brase yon dlo sikre, m kouvri ja a. M pran yon dan biskwit rale. M souke kòm pou m repouse kèk panse tris ki vle banm akolad. Men yo pa lage m yon may. Men nan men ak yo, m rive nan legliz la kote gwoup priyè a pral reyini nan yon ti kadè.
Annatandan m pwofite pou m pale ak granmèt la. Nan sa peyi sa ye la, fò k li di yon mo pou nou.
M glise sou jenou m pou m mete chay la ba. Moun k ap mouri lopital jeneral, timoun k ap tonbe anba bal pa erè, manman k ap pèdi pitit, fanm y ap bat paske yo frape machin gwo chabrak, sivil k ap bat chèf epi al kache anba jipon leta, goud la k ap pran pataswèl nan men dola a.
Lis la long toujou. M kouche pòpyè m sou je m, m louvri bouch mwen, m ranmase fòs mwen pou m kòmanse.
M pa menm gen tan pale, m santi yon moun tou swe tou bouke vin lage bikadav li kote m. M kannale sou yon bò men m pa tonbe. Lapoula koze kòmanse degrennen.
Vwa madanm nan pati kite legliz lan pou l ale layite nan fènwa deyò a. Se tankou l se pitit lejitim epi mwen m se pitit deyò donk selon li, limenm sèl ki gen lavwa ochapit ak Letènèl.
Enben sa m fè? Machwè m kenbe nan pla menm, m pe sèk. E kò m se pa nan chwichwi-chwichwi li ye, m tou pwofite tande.
– Papa ke benediksyon w vlope nou tout ki la, fanmi zanmi moun mwen konnen sa m pa konnen. M ap leve nan yon fason espesyal madan Wodrig devan w ki pral mande viza demenm maten.
M leve Minouch, pitit fi m, devan w, doubsis fin chwe nan ren l. Wi se vre li renmen ak tiPouchon men sanble m ap gentan mouri m p ap debouche yon kola?
Gen de renmen se tankou moun nan te nan seliba paske gason denojou se lwil kalalou yo pase sou yo. Ou pa fouti met men sou yo pou trennen yo anndan legliz.
– Rete mezanmi! Nan priyè a tout koze sa?
Madanm nan kontinye.
– M leve Chela devan w papa l ap plenyen ak yon pye. Yo di se nan mache a yo ba l yon kout lè. Men ou ki wè, ou ki konn fè wout, ou ki fè dlo antre nan kokoye pote gerizon pou li non papa.
M ap leve pitit vwazin, Janjan, m ap leve l devan w. Se pa sak klè ki gen gwo lestonmak la non papa. Se pa pitit madanm ki toujou ap joure sou katye a. Sa k nwa a, Janjan pitit machann sik lan nan koridò a. Beni l papa rantre l anba gras ou, kouvri l ak onksyon w.
Gras lamizerikòd!!! O o. Gadon sezisman. De jem ap fè balansin tèlman m sezi. M blije rale yon bak m chita sou ban an. M ap gade mouchwa madanm nan an bandisyon nan mitan tèt li, de pòpòt je l fèmen di epi l ap mete koze nan men Letènèl.
Lapriyè madanm nan dekonstonbre m. Poutèt manman l toujou ap drese zen w oblije bay Letènèl tout enfòmasyon sa yo pou se pa pitit li an li beni men pitit machann sik la. A non. M leve pou m al chache yon lòt plas paske sa resi twòp pou mwen. M tande vwa l k ap swiv mwen toujou.
– Papa o nou fè pitit nou pa fè santiman yo. Pou janm konnen m kapon Seyè menm yon pla sandal m p ap fè dèyè bèt ak zèl la, jis pou m pa fè antòs. Epi pou m wè Anita se nan manifestasyon li ye tout lasentjounen. M tande se yon lòt fòm san vyolans san brigandaj.
ki jou ki gen manifestasyon san vyolans isit? Te kwè demokrasi y ap pale a se nan bouch li ye. Yo toujou pare pou pete fyèl jenès la. Epi manifestasyon poukisa? M tande pou desann lavi chè.
E dat zòrèy bourik la ap pran baf nan men dola a? E dat ayisyen ap manifeste papa? Manifestasyon poukisa la a? Kisa k ap janm chanje isit, papa? Anita rete mòdikis ap di se jenès la ki pou chanje sa.
Wouuuu, yon moun ka bouke fè pitit men w pa fouti fè santiman l. Antouka se ou ki bay pitit papa. Di yon mo pou mwen paske nan peyi sila a yon moun ou wè jodi w pa ka konte sou demen. Pale nan kè Anita pou l kalma papa.
M mache pi vit pou m pa entewonp lapriyè madanm nan. Bondye pa ta dwe tande priyè sa, pa vre ?
Pyem vle debwate nan fè konkou ak sèvèl mwen kap mande si pa ta sipoze gen dè e dè Anita ki pou di non. Anita, Janjan sik, Minouch, Janjan Lestomak elatriye ki pou sispann vote pou mil goud. Sispann koripsyon sa yo, sispann malsite n ap benyen ladan l lan.
Mezanmi, je wè bouch pale. Ede m chache Anita !
Saïka Céus
