Haititweets.com ap pibliye yon omaj Rose Anne ‘Lody » Auguste bay kamarad li Manno. Yon omaj ki mete toutouni valè yon moun Peyi a ap manke anpil. Ann li…
Mwen pa konn 2 kanmarad tankou
Manno
Pou jan li te ka twoke kòn li ak
sosyete pwazon san paspouki…
Mwen pa konn 2 kanmarad tankou
Manno
Ki te ka jere sansibilite sosyal li nan
kòlè ….
Mwen pa konn 2 kanmarad tankou
Manno
Ki pi moun nan kesyon moun ki moun
tout bon
menm si l dwe goumen otan k li vle
ak zanmi l, kanmarad li…
Mwen pa konn 2 kanmarad tankou
Manno
Ki pap menm sonje egzistans tèt pa l
Lè pou l rezoud pwoblèm mizè yon
vwazinay nan Kafou….
Mwen pa konn 2 atist chantè tankou
Manno
Ki ka konpoze yon melodi pandan l ap
ekri tèks la, la pou la….
Mwen pa konn 2 atist tankou Manno
Ki ka ranmase karaktè peyi l pou l
mennen tout yon jenerasyon
wè klè sou wòl lEta nan sosyete nou
an…
Manno te gen mannyè pa l pou l blaze
sosyete sa a
Ki kanpe an kwa kont jistis sosyal pou
vrè moun y ap eksplwate…
Mano, karakteryèl, Manno rebèl jouk
nan zo,
Men Manno trè moun e twò moun pa moman,
Sitou lè l an kòlè …
Kanmarad Manno,
Banm yon ti limyè pou m konprann sa
k ap pase nan peyi m …
Mèsi Kanparad Manno pou richès ou kite
pou patrimwàn lapawoli ak mizikal lakay !
Mèsi Kanmarad Manno
pou angajman w
malgre karaktè rebelyon w!
Mèsi sitou pou jan w aprann renmen moun
e sitou te toujou rete moun
Malgre agresyon sosyete pwazon!!!
W ap toujou rete vivan nan mitan nou, Kanmarad Manno!
Rose-Anne Lody Auguste
Kafou Fèy, dimanch 10 desanm 2017
A lire aussi : Manno Charlemagne n’est plus parmi nous…
